حبيبتي لن تضع الخاتم إلا في أصبع طفلها 

مهداة إلى أخي الشاعر حميد سعيد 

حينت أنا ولدك صلبوني

حينت أنا ولدك عماوا عيوني ،

حينت بغيت نسافر في قلبك باش تولديني

قطعو عليا الطريق وعذبوني

بالعشق وبالزندقة اتهموني .

بديت نعشق في وقت كنتي فيه قرية وحبيبة ،

وكنا جوج توام

سولت على اسمك ﭭالو لي : سليبة ،

وعن أيامك ﭭالو : مجروحة وحزينة

حرفتها الغربة والعذاب

تعيش بين أهلها غريبة  .

شقي بطنك وجعليني طفلك نكتب بالنار

وكفنيني في يوم ميلادي ،

ونقشي على صدري اسمك المختار

وفي ميلادي

يكون عرسي بيك يا بلادي .

يا طفلة ولدَتْ قبل ما ترشد

سولت احبابك ﭭالو عليا حرامي وشيطان ،

امو تخاف عليه الموت..

وهانا مسافر ليك هازاني لـشواق ولـحزان ،

نجري  نجري ، وجناحك مكسور

نعاهدك ماني ميت حتى تطلعي

شمس هاد الزمان .

جريت باش نسكن في عيونك ألف عام

وحينت الأرض كتدور وصلت منين بديت ،

لقيتك شاقة صدرك لسرب الحمام

الحزن داير بيك ..

فتحتي عيونك والنار فيا شعلت  

كتبو عليك داسرة ومسخوطة

بكيت.. ولقيتك لهثانة حينت جريت ،

لقيت بين يديك كتابي وفاسي ،

ولوحة مكتوب عليها : سجني

                                ومشيت  .

ودخلت عيونك باكي

شفت شلة فقراء .. ﭭلت هادوك ناسي .

بست يديك .. ﭭالو لي : قبلت مقبرة ،

ﭭلت : أنا عاشق متبوع

ﭭالو : ها دمنا لك محبرة ،

ونقش اسمك على قبرك ،

يا ضيف المقبرة  .

بديت نصيح وحليت عيني قبل الأوان

ومشيت بلا رجلين وسكنت قلبك ،

هانا مستعد نموت يكفي أنك تعاهديني

تولديني ونفوز بحبك ،

ها هو السيف وها هو قلبي

قطرة منو فيها عمري وعمرك .

باش من إسم نناديك ؟!

كنتي قرية وحبيبة ..

سجني ومقبرة احبابي

قولي : باش من إسم نناديك ؟!

أنا مواعـدك ما نبوح بإسمك

غير إيلاما كمل عشقي

وطلعت نخلة مزروعة فيك .

ﭭالو : حالفة حتى عريسك يركب الشمس

ويسرج للقبلة في هاذ الفجر ،

والريح هبت تنكس اعلام لـخـوا

وتفرش طريقو بالمسك والعنبر ،

وﭭالو: خيوط الشمس كتبت حروف

ورسمت صورة

حروفها حمرا مثل الجمر .

اقراو فيها: الفقرا هم عريس هاذ الثورة

هم الفرسان .. هم النخلة في القلب مزروعة

وتأملوا الصورة

فيها أم دايرة الخاتم في اصبع ولدها ،

ﭭلت لهم :

هي أمي وأنا ولدها .

ﭭولي لهم : كذبتو أنا ماشي عاﭭـرة

وأنا لازم ما نولد ،

وخا شربتوني لحبوب

ولدي عريسي وغيرو ما نولد ،

قلبو على كل الخيام

وعينو عليا ما ترقـد.

تنزل الشتا والحياة تعود

هانا مسحي عليا تراب لقبر

وضعي في يدي الخاتم ،

وولدي أطفال

يكونو دم الميت الحي

خلي لخبار  تـﭭول : ها لعريس قادم .

سولوني:      

شكون يولد الآخر، أنت أو أمك ؟!

وهانا جيت عريس ومولود.

ردي الراس المقطوع،

نفخي في صدرك،

توقف القبور وتقصف الرعود .

هانتي مادة يديك مسحي ترابي

واسقيني من دموع اللي ماتو

خليني نطلع نخلة في ابلاد احبابي

وعلامة للرايحين لـقلبك

ها صبعي دخْلي الخاتم وﭭولي لكل الناس :

أنا مرضي ، فايز بحبك .

النار فيا شعلت ..     

كلي تبدلت..  

الخاتم في صبعي

والروح رجعت ..

أنا ماشي .. أنا ماشي

                         نقولها لحبابي .

وما ناسيش شكون لحباب

دوك اللي زولو   الكفن

وسرجو الخيل ،

وتحرﭭو باش الشمس تطلع في الليل .

هاذوك الفقراء ذابحين لغراب

هادوك هما احبابي ..