تجاعيـد فجـر بلادي
الماضي خربة ما خلات أطلال
وأنا مصلوب في عيون الناس جوال .
قطروني روح تايهة في بلاد الأحزان
وسماوني لعنة هاد الزمان .
سلوا ظفاري وقطعو لحمي ،
صوروني على الثلج بالفاخر
وبالما على الرمل كتبو اسمي ،
وغناو يانانان يا نانان .
وغنيت أنا : أنا اوليدي
هي .. هي جاية تحمار وتخضر،
أنا وليدي
هي .. هي جاية قايدها عمر .
ايامنا فيها الثلج ما تنوض غبار
والشمس اللي في القلب ما تحجبها أسوار.
تعري القبور المهجورة ،
كلامنا جنازة تمشي بلا قبة مرشومة
وبكانا بالتخبية ماهو حجة معلومة
غير إيلا ما زالت هاد المدينة المسحورة ،
راحنا اوليداتها
وليدات ديك اللي كفنها الرماد ،
ديك اللي وصاتنا
نكونو لهاذ الأرض ما وسماد ،
باش ينوض الورد في القرية المخمورة .
ونقدموه للفجر
دايرين معاه ميعاد ،
غدا قبل الصبح في هاذ البلاد .
ونغنيو : أنا وليدي
هي .. هي.. جاية تحمر وتخضر
أنا وليدي
هي .. هي .. جاية قايدها عمر
هزيت خيمتي وركبت على ناقتي
نطوف في زماني
ما حد رشدني
ما حد اهداني
لقيت راسي مدفون بلا اسمية ،
سافرت بلا جواز وبلا ميعاد
بلادي ما عندها حدود
إيلا سولوك يامَّا عليا
قولي لهم : متبوع هي السمية .
وغني : أنا وليدي
هي .. هي.. جاية تحمر وتخضر
أنا وليدي
هي .. هي .. جاية قايدها عمر
فيك كنتوجع يا زمان لبهوت
فيك وجهي مدفون في المراية ،
نكتب على جناحها قصة الشيطان
وحوا والمراية ،
وعلى القميص يا بحر فيك أنا مسكين .
يا ليل زماني فيك أنا غريب
أختي في السوق تبيع صدرها
وامي شوافة
وابا يبيع كلام حزين .
وخويا على المشنقة يتسنى خوه ،
قل لي يا زمان البهوت
واش الخو ينكره خوه ،
أنا مسافر مجروح
نجيب ليه هدية
نجيب ليه فجر كبلوه .
ونغني : أنا وليدي
هي .. هي.. جاية تحمر وتخضر
أنا وليدي
هي .. هي .. جاية قايدها عمر .
|
